I be fool for your love
Nor mean sey silence na di best answer.
I no want be sharp-shooter again,
cos I want mek you my wife
So na only you go dey receive my shots.
My target na to stay forever with you.
If love na crime, I dey ready to chop life sentence for your mata
Na im mek I dey write you my life
with this pen and paper
Abeg, be di shore wey dey protect me
from di sea
Hear my heartbeat, mek im noise
no mek me craze
If your love na time
Then, my mind na di bomb
Forget Chris and OBO,
cos na you dey blow my mind
Everything wey you need,
I no go ever undermine
I go carry your mata for head
I no go ever undermind am.
If I be email, na you be my CC
If love blind as dem say,
Na only you i still dey see
If love na game, I no dey do hide and seek
And na you I still dey seek.
If my heart na sore from heartbreak
Na you be my stitches.
I hope sey you go mek me your number one
As for me, dey sure of my trust to di moon
Di diamond for my heart, na you get right
to tek am
And for our union, na only unity we go know – so bank on me!

©️ Ifeanyichukwu Awele Onwuatuelo

Lagos, Nigeria.

Ifeanyichukwu na French graduate from di University of Benin, Nigeria. Im dey do im NYSC for Lagos. As person wey dem born for Warri, Pidgin na wetin im don dey blow since when im dey small. Im na spoken word artist with di stage name “Reword”. Ifeanyichukwu want mek di world sabi sey Naija Pidgin follow dey poetic and appealing like other language dem.

Adie Lawrence

Leave a Reply

%d bloggers like this: