I sight you from far
I come smile, but na your own smile fine pass
I waka reach you
You come hug me like sey I been die,
Then, come wake up.
My mind settle
We come lock our fingers for one improper connection
But we no mind
So far sey you dey and I dey, wahala no dey
Till your grip loose
I dey try understand when your hand slide komot
Now I don see am
As your guy dey look us from where im dey,
The feeling no sweet at all.
E no matter wetin we share, friends go always be second
Everybody get person wey their heart dey beat for
How I wan tek tell you
Sey na you I dey live for
Even as you dey with another guy
Your heart don already lap with my own;
E dey interwoven with your own forever?
©Tochukwu Precious Eze
TOCHUKWU PRECIOUS EZE
Tochukwu Precious Eze na Naija boy from Enugu State. Na for Onitsha, Anambra State wey im grow. Im study Microbiology for University of Nigeria, Nsukka.
Tochukwu na poet and tori writer. Im poems don appear for plenty magazines, anthologies and websites. Na im be di founder of Direwords, and lead author & editor of di book ‘This Village Will Forever Sing Your Praise.
Poems wey pipul dey write for Naija Pidgin dey always sweet Tochukwu. So, na why im follow join hand to write for di language to promote am.