THE DAY I HEAR WALL GECKO TALK

THE DAY I HEAR WALL GECKO TALK

THE DAY I HEAR WALL GECKO TALK

DAY 1

I happy sey dem give us holiday…
I dance, I sleep, I kom balance for chair
call my paddy…I no even know sey night don do…

DAY 2

I still dey talk to my people…I no sleep at all, I just dey talk…
Iya Risi kuku tell me all her tori and na so me and am kom dey cry…till we kom dey laf…thank God gofment give us holiday!

DAY 3

My food burn today because I dey talk to papa Franka…I throway water for ground again…and the house done scatter because of sey I dey do holiday…

DAY 3

Na God save me for night…the talk wey I dey do don too much…I carry phone go kitchen… Na so I hear gbaaaam!

DAY 4

This holiday don dey tire me ooo… Iya Amala don get Corobirus and na yesterday I buy her food…

DAY 5

Make e no be sey I don catch Corobirus…na so I dey cough, dey sneeze…dey even hear my lungs dey beat gbua! gbua!! gbua!!!

DAY 6

Coro dey make person see double? I don dey see pipul dey waka upside down…

Day 7

Wall gecko kom dey talk to me….na im I call my mama: ‘mummy wall gecko dey talk?’
Haaa e don happen ooo!

DAY 8

I don wear mask, wear rubber trouser, wear rubber shoes -the type wey Fulani dey wear…this Corobirus must not touch me!!

DAY 9
When lockdown go finish? Wall gecko don bigin dey give me instructions…

The wall gecko get 1010 spots…see wetin lockdown do me?

©Linda Mustafa
New Bussa, Nigeria

MUULSTAFA LINDA JUMMAI

Mustafa Linda Jummai dey teach English and literature-in-English for Ibrahim Babangida Badamasi University Lapai, Niger State Nigeria. With her first degree for Mass-Communication/English, she bin don do journalism.

Linda na teacher, journalist, novelist, poet and designer wey don write plenty of poems. She be one of the poets wey dem publish her poem for The Markas, one anthology of poem about di yama yama wey Boko Haram dey cause for North East of Nigeria and di editor na one of Nigeria’s known poet Tanure Ojaide. Today, she dey do her post graduate programme for University of Ilorin, Ilorin Kwara state, Nigeria.

Adie Lawrence

Leave a Reply

%d bloggers like this: